Претставата „Сестрите Прозорови“ на велешки театар ја отвора драмската програма на Охридско лето
04.08.2020
Претставата „Сестрите Прозорови“, продукција на Народниот Театар Јордан Хаџи Константинов-Џинот од Велес ќе биде изведена на фестивалот „Охридско лето“ на 05.8.2020 во предворјето на црквата Света Софија, со почеток од 21:00 часот, со што ќе биде отворена драмската програма на овогодинешното издание на фестивалот.
Оваа продукција, чија премиера беше на почетокот на 2020 е коавторски проект на Сашо Димоски и Васил Зафирчев, според мотиви на чеховите „Три сестри“, авторски и документаристички материјали. Костимографијата на претставата е на Раде Василев, а во неа учествуваат актерите: Кети Борисовска, Маја Љутков, Славица Манаскова, Жарко Спасовски и Фаик Мефаилости, додека плакатот е на Филип Коруновски.
Сестрите Прозорови“ е еден од текстовите во книгата „8/4“ на Сашо Димоски.
Книгата „8/4“ ќе биде претставена токму со оваа фестивалска изведба.
„Книгата ’8/4‘на Сашо Димоски привидно ја подигнува ковид-завесата на затворените театри. Во оваа книга се раскажуваат приказни од театарски и балетски сцени, се повикуваат духови од некои театри, се препишуваат дневнички страници. Во ’8/4‘ д-р Сашо Димоски маркира (на два јазика – македонски и англиски, како и низ мноштво фотографии) значајни точки во рецентната македонска театарска стварност и го презентира личниот, авторски инструментариум, го слика сопствениот ’homo ludens‘од другата страна на завесата“./У.Ј