Volkswagen го презема европскиот пазар за електромобили
30.11.2020
Најпродаваното електрично возило во Европа во октомври 2020 година е Volkswagen ID.3, со испорачани 10.475 примероци. Компанијата Volkswagen, инаку, многу години е на врвот со најпродаваниот конвенционален автомобил во Европа – моделот Golf, а сега, се чини, го презема водството и во областа на електромобилите.
Европскиот пазар на автомобили забележа пад на продажбата од 7 отсто минатиот месец, но во истовреме, продажбата на електромобили (хибриди и целосно електрични возила) скокна за 153 насто во споредба со истиот месец лани. На овој начин, електрифицираните возила веќе ги надминуваат дизел-возилата во продажбата.
Продажбата на чисто електрични автомобили скокна за 197 отсто од октомври минатата година. На второто место, по Volkswagen е Renault Zoe со 9.778 продадени возила, а трет најпродаван електромобил е Hyundai Kona Electric со 5.261 возила.
На место број 4 е KIA e-Niro (3.868 продадени автомобили), а петти е Peugeot e-208 (3.757 автомобили). Меѓу првите 10 се Smart Fortwo, BMW i3, Vauxhall Corsa на Opel, Mini Cooper SE и Nissan Leaf.
Интересно е што моделите на Tesla не се меѓу првите десет најпродавани електромобили.
Мите Јаначков