Горивата од полноќ поскапуваат за денар до 1,5 денари по литар
18.01.2021
Горивата од ноќеска на полноќ поскапуваат за денар до 1,5 денари за литар, одлучи денеска Регулаторната комисија за енергетика и водни услуги. Со одлуката се врши зголемување на малопродажните цени на нафтените деривати во просек за 2,53 отсто.
Малопродажните цени на бензинот ЕУРОСУПЕР БС-95 и на ЕУРОДИЗЕЛ (Д-Е V), се зголемуваат за еден денар за литар и ќе изнесуваат 63, односно 54,5 денари.
Малопродажните цени на бензинот ЕУРОСУПЕР БС-98 и на Екстра лесното масло за домаќинство (ЕЛ-1), се зголемуваат за 1,5 денари за литар со што ЕУРОСУПЕР БС-98 ќе се продава за 65 денари, а Екстра лесното масло за домаќинство за 54,5 денари.
Со одлуката на Регулаторна Комисија за енергетика за 1,772 денари за килограм се зголемува и малопродажната цена на Мазутот М-1 и ќе изнесува 30,823 денари.
Како причина за зголемувањето на малопродажните цени на нафтените деривати од Регулаторна Комисија за енергетика ги посочуваат зголемените референтни цени на нафтените деривати на светскиот пазар во изминатите седум дена и тоа кај бензинот во просек за околу 5,708 отсто и кај дизелот за околу 4,285 отсто, како и за 0,845 отсто повисокиот курс на доларот во однос на денарот.
#Поскапување #НафтениДеривати #ЕуросуперБС-95 #ЕУРОДИЗЕЛ