Значително зголемениот број заболени го врати полицискиот час

 4.06.2020
За разлика од останатите земји во регионот, во кои бројот на новозаразените е сведен на минимум, по значително зголемениот број новодијагностицирани случаи со Ковид-19 во земјава, Владата донесе одлука да се воведе целосна забрана на движењето на сите граѓани во Скопје, Куманово, Липково, Штип, Карбинци, Тетово, Боговиње, Брвеница, Теарце, Желино и Јегуновце. Забраната на движењето почнува вечер, од 21 часот, и ќе важи се’ до понеделник во 05:00 часот.

Во сите останати градови се забранува движење на сите граѓани од вечер, од 21:00 часот до наредниот ден, до 05:00 часот наутро. В петок, сабота, в недела во тие градови забраната започнува од 16:00 часот и трае до следниот ден до 05:00 часот наутро. Петок е прогласен за неработен ден за сите граѓани. Владата ја донесе оваа одлука на вчерашната 60-та седница, согласно препораките на Комисијата за заразни болести.

Од вечер, од 21:00 часот до понеделник, до 05:00 часот, се забранува посета на гробиштата на територијата на цела држава, освен за погреби.

Отстапките од овие забрани се однесуваат за земјоделските активности, поради што е дозволено движење во рамки на територијата (атарот) на селата, исклучиво за работните потреби. Аптеките ќе работат непречено, а Министерството за здравство ќе изработи план за непречена работа и на здравствените установи.

Исклучоците од забраната за движење важат за полицијата, армијата, здравствените работници (во ЈЗУ и ПЗИ, како и матичните лекари) и за маркетите и рестораните кои вршат достава на производи, при што тие своите ангажмани ќе ги реализираат непречено.

Остануваат да важат сите издадени дозволи за движење за време на претходните забрани за движење кои беа воведени, особено за економските оператори и за работа организирана во смени. Прошетката на милениците ќе биде во веќе востановените термини во периодите 08:00 до 8:30, 15:00 до 15.30 и 20:00 до 20:30 часот. Забраната за движење не важи за лицата со попреченост и за нивните придружници доколку имаат соодветна документација.

Министерот за здравство Венко Филипче вели дека групирањата, непочитувањето на мерките и неказнувањето се причина за раст на заболените и враќање на полицискиот час.

Повторното воведување на рестриктивните мерки следува по зголемениот број новодијагностицирани случаи со Ковид-19 во земјава во изминатите денови. Само вчера беа регистрирани 101 случај со Ковид-19, од кои најголемиот дел се од Скопје – 59. Заразени има и во Куманово-12, Штип-седум, Струга – шест, Тетово – пет, во Гостивар и Кочани има по три случаи, Пробиштип – два, а по еден случај во Прилеп, Велес, Охрид и Кавадарци.

Институтот за јавно здравје вчера регистрира десет оздравени пациенти и четворица починати.

Вкупниот број на Ковид дијагностицирани во земјава од почетокот на епидемијата изнесува 2.492, бројот на оздравени пациенти е 1.605, а на починати 145. Во моментов во земјава има 742 активни случаи.
Досега се направени вкупно 32.161 тестирања на Ковид -19.