ДОМ бара Владата да прогласи вонредна состојба
Демократската обнова на Македонија преглага Владата да прогласи вонредна состојба поради екстремното загадување. Според портпаролката на партијата, Маја Морачанин, Владата во заминување требаше да покаже доблест и уште на почетокот на зимата да го свика меѓусекторското тело составено од служби на Град Скопје, Министерството за животна средина и сите надлежни инспекторати и институции задолжени за животна средина формирано во 2011 година, кое на експресен начин може да ги утврди состојбите.
– Тоа е последна можност граѓаните да ја запомнат владата во заминување барем по нешто полезно за нивното здравје, зошто податоците за 1200 смртни случаи и финансиски загуби од 250 милиони евра годишно како резултат на загадениот воздух се поразителни, рече Морачанин и повика на масовност на утрешниот протест против аерозагадувањето.
Од партијата велат дека во изминатите години јавно предлагале краткорочни и долгорочни мерки за справување со загадувањето, кои иако влегле во законска регулатива и во програмските документи на институциите, недостасувала волја за нивно доследно спроведување.
– Затоа сега, во услови на 20 пати повисока од дозволената концентрација на ПМ 10 честичките, ДОМ инсистира на следните мерки: Воведување пар-непар по примерот на Париз и Сараево, бесплатен јавен превоз, повеќе автобуси во јавниот превоз и јавен превоз во градови каде што го нема, воведување евтина дневна тарифа за струја на домаќинствата, затворање на градилиштата, зелена зона за пешаци и велосипедисти во центарот, забрана за движење на возила под еуро 4 стандард во градскиот сообраќај, субвенции за печки со целосно согорување и квалитетни горива во домаќинствата, редовно миење на улиците со калциум магнезиум ацетат, строга контрола на индустриските објекти, особено ноќе и за време на викенд и редовно собирање на отпадот, рече Морачанин.
Извор: А1он.мк
