EFJ го повика Хан да изврши притисок врз Владата за реформите во медиумите да се случат пред изборите

Ви го пренесуваме писмото на Европската федерација на новинари кое беше адресирано до Комесарот за проширување и соседска политика на ЕУ г.Јоханес Хан:

Почитуван комесаре Хан,

Во име на Европската федерација на новинари (EFJ), која претставува над 300.000 новинари од цела Европа, и нашите членки во Македонија, Здружението на новинарите на Македонија (ЗНМ) и Синдикатот на македонските новинари и медиумски работници (ССНМ), Ви пишуваме со сериозна постојана загриженост за состојбата со слободата на медиумите во Македонија.

Како што знаете, од 2015 година, Македонија се наоѓа во длабока политичка криза откако опозицијата го бојкотираше Парламентот и го објави скандалот со прислушувањето. Опозицијата во следните месеци обелодини серија телефонски разговори главно меѓу високи претставници на Владата, кои индицираат сериозни незаконски активности, злоупотреба на службената должност и корупција. Како дел од овој скандал како што тврдеше опозицијата е и тоа дека повеќе од 100 новинари биле нелегално прислушувани од државната тајна служба.

Во јуни 2015 година, главните политички партии кои ја претставуваат владејачката коалиција и опозицијата под силно посредување од Вас (ЕУ), Европскиот парламент и САД, потпишаа договор за надминување на политичката криза во земјата. Главниот заклучок на овој договор беше дека треба да се организираат слободни предвремени парламентарни избори и да се преземат итни реформски мерки за што сите страни се согласија. Еден од итните приоритети од Договорот е реформата на медиумите и слободата на изразување во Македонија со цел да има слободни и кредибилни избори, како апсолутен предуслов за демократски избор.

Заедно со нашите локални членки, ние сме сериозно загрижени дека ЕУ не е целосно конзистентна во своите изјави за реформите на медиумите. Од оваа недела, ЕУ престана да инсистира дека е потребно да се случат реформи за медиумите пред изборите кои се презакажани на 5-ти јуни.

Ние сме убедени дека ако не го искористиме овој момент за спроведување на медиумските реформи, кога сите потписници се на преговарачка маса, ќе пропуштиме одлична можност да имаме сериозни промени кои сите ние ги чекаме толку долго, а се од клучно значење за Македонија и во регионот. Тешко е да се има фер избори кога главните медиумите се под директно влијание на владата.

Ве повикуваме вас, драг комесаре, да извршите притисок врз владата дека реформите во медиумите во Македонија треба да се случат пред изборите, како што е наведено во “Договорот на Пржино”. Ова е единствениот начин да се ослободат медиумите од политичкото влијание на владата како предуслов за професионално известување за претстојните избори.”

Mogens Blicher Bjerregård

Претседател на Европската федерација на новинари