Асфалт и атмосферска канализација за пет краци на улицата „Кочо Рацин“ во Чашка

На еден од вкупно петте краци на улицата Кочо Рацин во Чашка се родил и живее Тоше Атанасовски. Тој не знае како е да се гази по асфалт. Досега својот живот го поминал газејќи од влезната порта директно во кал. Поројните дождови ја слевале водата од ридот во подрумите на неговиот и на домовите на соседите. Асфалтирањето на овој дел од улицата и изградбата на атмосферска канализација за него значи надеж за нов живот.

– Секако, сега атмосферската вода ќе се прибере во атмосферската канализацја и нема да имаме кал. За нас значи живот, рече Атанасовски.

Општината преку проект ги обезбеди средствата од Програмата за рурален развој. Тие се од клучно значење за граѓаните, затоа што ќе обезбедат квалитетни услови за живот и ќе ја подобрат инфраструктурата, рече Градоначалникот Горан Стојановски .

– Овој проект е важен затоа што 40 отсто од населението на оваа општина живее токму во овој дел од општината. Освен овој проект кои тежи 15,1 милион денари во нашата општина ќе се реализира и уште еден проект а тоа е изградба на локален пат со поврзување на село Буслици и Војница со регионалниот пат Велес – Прилеп кој изнесува близу 20 милиони денари. Тој со градба ќе го почнеме веќе од наредната недела, додаде Стојановски.

Директорот на Агенцијата за финансиска поддршка во земјоделството и руралниот развој, Николче Бабовски и неговиот заменик Авдул Селам Селами, направија увид на почетокот на градежните активности на улица Кочо Рацин.

– Во овој дел од Република Северна Македонија преку двата проекти кои ќе се реалиизраат се инвестираат вкупно 35,1 милион денари. Овој е историски проект бидејќи прв пат во 21- ви век на овие улици кои беа земјани и полни со кал се поставува асфалт и атмосферска канализација. Се решава за жал, егзистенцијален проблем во овој дел од земјава, додаде Бабовски.

Преку средства од Програмата за рурален развој низ држава започната е реализација на 200 проекти, во сите општини, со вкупна вредност од 38 милиони евра. Тие се дел од мерките на Владата за создавање поквалитетни услови за живот, запирање на одливот на млади луѓе како и за мотивирање на граѓаните за создавање на сопствени бизниси, отворање на работни места и развивање на малите рурални средини. /У.Ј