На сцената на велешки театар, годинава, четири премиери
Велешки театар годинава ќе работи четири претстави финансирани од министерството за култура. Тоа ќе бидат претставите „Тирамису“ – на полската авторка Јоана Овшианко во режија на Софија Ристевска, „Театар, љубов моја!“ на бугарскиот автор Валери Петров во режија на Деан Дамјановски , потоа „Синиот портокал“ на британскиот автор Џо Пенхол во режија на Александар Ивановски и „Песни за татковината“ – авторски проект на актерот Петар Темелковски посветен на Никола Јонков Вапцаров.
“Годишната програма на театарот е конципирана согласно камерните форми на театар и е ориентирана кон промоција и афирмација на современото драмско писмо.” – изјави Васил Зафирчев уметнички директор на велешкиот театар ,,Јордан Хаџи Константинов Џинот”.
Тој најави дека ќе се реализираат и неколку проекти од сопствени средства, како и еден посветен на најмладата публика.
Прва годинешна премиера на велешки театар ќе биде праизведбата на ,,Ана Комнена,” најавена за крајот на февруари, како последна премиера од минатогодишната програма на театарот. Работена е според истоимениот драмски текст на Сашо Димоски, второ рангиран на конкурсот за отворањето на новата театарска зграда, а во режија на Ненад Витанов и Васил Зафирчев.
“Станува збор за голема продукција во која учествува целиот ансамбл на театарот. Историска драма на византиска тема, за некрунисаната императорка на Византија и автор на историската книга “Алексијада”, посветена на нејзиниот татко императорот Алексеј Комнен – најави Зафирчев.
Годинашнава театарска сезона ма велешки театар започнува вечерва со одигрувањето на претставата ,,Класен непријател”. На репертоарот на театарот в петок е претставата ,,Добрата надеж”, а во сабота ,,Спанаќ со пржени компири”.
Минатата година на редовниот репертоар на театарот беа изведени вкупно 69 претстави со вкупна посетеност на публиката од 15.275 гледачи.